Рӯзи Артиши миллӣ, ки ҳамасола 23 феврал дар тамоми қаламрави Ҷумҳурии Тоҷикистон бо эҳсоси баланди ифтихору сарбаландӣ таҷлил мегардад, яке аз муҳимтарин ва рамзитарин санаҳои таърихи навини давлатдории тоҷикон ба шумор меравад, зеро маҳз таъсиси Қувваҳои Мусаллаҳ пояҳои аслии ҳифзи истиқлолияти давлатӣ ва таъмини амнияти миллиро устувор гардонид. Таъсиси Артиши миллӣ дар марҳилаи ниҳоят ҳассос ва пуртазоди таърихӣ, ки кишвари мо давраи душвори сиёсиву иҷтимоиро паси сар менамуд, бо ташаббуси бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ Эмомалӣ Раҳмон 23 феврали соли 1993 амалӣ гардида, ҳамчун иқдоми тақдирсоз барои таҳкими давлатдорӣ ва ҳифзи тамомияти арзии кишвар арзёбӣ мешавад. Дар он шароите, ки ҷомеа ба сулҳу субот, оромӣ ва муттаҳидшавӣ ниёз дошт, таъсиси артиши миллӣ ҳамчун неруи мутамарказ ва муназзами давлатӣ ба барқарорсозии тартибот ва ҳифзи арзишҳои истиқлолият мусоидат намуд. Артиши миллӣ аз рӯзҳои аввали фаъолияташ вазифаи муқаддаси ҳифзи марзу буми Ватан, таъмини амнияти шаҳрвандон ва ҳимояи манфиатҳои миллиро бар дӯш гирифта, дар роҳи устуворсозии суботи сиёсӣ саҳми арзишманд гузошт. Бо гузашти солҳо Қувваҳои Мусаллаҳи Ҷумҳурии Тоҷикистон тадриҷан такмил ёфта, сохтори идоракунӣ, низоми омодабошии ҷангӣ ва заминаи моддию техникии он мустаҳкам гардид, ки ин раванд ба болоравии иқтидори мудофиавии давлат таъсири мусбат расонд. Имрӯз Артиши миллӣ ҳамчун ниҳоди муҳими давлатӣ дорои қисмҳои гуногуни ҳарбӣ, қӯшунҳои хушкигард, қувваҳои ҳавоӣ ва дигар сохторҳои махсус мебошад, ки дар ҳамоҳангӣ бо якдигар барои таъмини амнияти кишвар фаъолият менамоянд. Тавассути барномаҳои давлатӣ ва ислоҳоти низомӣ сатҳи таълиму тарбияи афсарону сарбозон боло рафта, онҳо бо техника ва таҷҳизоти муосир таъмин мегарданд, то ба талаботи замони муосир ҷавобгӯ бошанд. Дар баробари рушди имкониятҳои техникӣ, ба масъалаи тарбияи маънавию ахлоқии хизматчиёни ҳарбӣ низ аҳамияти аввалиндараҷа дода мешавад, зеро неруи аслии ҳар як артиш пеш аз ҳама ирода, садоқат ва шуури баланди ватандӯстии сарбозону афсарони он мебошад. Артиши миллӣ на танҳо нерӯи мудофиавии давлат, балки мактаби бузурги шуҷоат, интизом ва масъулиятшиносӣ барои ҷавонон маҳсуб меёбад, зеро хизмат дар сафи он дар руҳияи эҳтиром ба қонун, риояи тартибот ва садоқат ба Ватан сурат мегирад. Барои ҳар як ҷавонмарди кишвар адои хизмат дар сафи Қувваҳои Мусаллаҳ ифтихори бузург буда, ӯро ба зиндагии мустақилона, таҳаммулпазирӣ ва устуворӣ омода месозад. Маҳз дар муҳити низомӣ ҷавонон эҳсос мекунанд, ки ҳифзи марзу буми Ватан қарзи муқаддаси шаҳрвандист ва ҳар як нафар бояд дар таҳкими сулҳу субот саҳми худро гузорад. Ин раванд ба ташаккули ҳисси баланди худшиносии миллӣ ва масъулияти шаҳрвандӣ мусоидат намуда, ҷомеаро муттаҳид месозад. Дар ҷаҳони пуртазоди имрӯз, ки хатарҳои гуногуни амниятӣ, аз ҷумла терроризм, ифротгароӣ, гардиши ғайриқонунии маводи мухаддир ва дигар таҳдидҳои фаромиллӣ мавҷуданд, мавҷудияти артиши пурқуввату омодабош барои ҳар як давлат амри зарурӣ ба ҳисоб меравад. Ҷумҳурии Тоҷикистон, ки дар минтақаи дорои аҳамияти геостратегӣ ҷойгир аст, ба масъалаи таҳкими иқтидори мудофиавӣ ва баланд бардоштани сатҳи омодабошии ҷангии Қувваҳои Мусаллаҳ диққати махсус медиҳад. Артиши миллӣ дар ҳамкорӣ бо дигар сохторҳои қудратӣ ва мақомоти ҳифзи ҳуқуқ барои таъмини амнияти сарҳадот ва суботи дохилии кишвар пайваста чораҳои муассир меандешад. Ин талошҳо ба он равона шудаанд, ки сулҳу оромии кишвар ҳифз гардида, шароити мусоид барои рушди иҷтимоиву иқтисодӣ фароҳам оварда шавад. Таҷлили Рӯзи Артиши миллӣ на танҳо як маросими расмӣ, балки ифодаи эҳтиром ва қадршиносии тамоми мардуми кишвар нисбат ба ҳомиёни Ватан мебошад, ки бо ҷасорат ва матонат вазифаи худро иҷро менамоянд. Ин рӯз моро водор месозад, ки ба қадри сулҳу субот, истиқлолият ва ваҳдати миллӣ бештар расем ва дар ҳифзи онҳо масъулияти шахсӣ эҳсос намоем. Артиши миллии Ҷумҳурии Тоҷикистон имрӯз ҳамчун такягоҳи устувори давлатдорӣ ва рамзи нерумандии миллат эътироф гардида, бо иродаи қавӣ ва рӯҳияи баланди ватандӯстӣ рисолати муқаддаси худро идома медиҳад. Бо итминони комил метавон гуфт, ки дар оянда низ Қувваҳои Мусаллаҳи кишвар ҳамчун сипари боэътимоди давлат барои ҳифзи марзу буми Ватан, таъмини амнияти миллӣ ва таҳкими сулҳу суботи ҷомеа хизмат намуда, номи неки ҳомиёни Ватанро бо ифтихор баланд нигоҳ хоҳанд дошт. Илҳом САФАРОВ, муовини директор оид ба тарбияи Коллеҷи техникии ДТТ ба номи академик М.Осимӣ
Categories: Хабарҳо
